Flestir í nútíma vestrænum samfélögum nota snjallsíma, spjaldtölvur og tölvur daglega. Hvort sem það er í vinnu, til þess að skoða fréttir eða fletta samfélagsmiðlum, eyðir fólk oft mörgum klukkustundum með höfuðið hneigt fram. Þessi venja hefur leitt til hugtaks sem kallast „Text Neck“, eða „Tech Neck“.
Þótt nafnið sé nýlegt er vandamálið ekki endilega nýtt. Hálsinn er einfaldlega ekki hannaður til að vera í sömu stöðu klukkutímum saman, dag eftir dag.
Hvað er Text Neck?
Text Neck er samheiti yfir verki, stirðleika og vöðvaálag sem geta þróast þegar höfuðið er lengi í sömu stöðu, þ.e. hallað fram á við, við notkun síma, tölvu eða annarra skjátækja.
Þegar höfuðið hallar fram færist þyngdarpunkturinn frá líkamanum. Þá þurfa vöðvar í hálsi, öxlum og efra baki að vinna mun meira til að halda höfðinu uppi. Ef þetta verður dagleg venja getur það leitt til:
- verkja í hálsi
- stirðleika í öxlum
- spennuhöfuðverkja
- þreytu í efra baki
- minnkaðrar hreyfigetu í hálsi
- vöðvaspennu sem getur valdið verkjum niður í herðar og handleggi.
Er slæm líkamsstaða eina orsökin?
Ekki endilega, oft eru þetta nokkrir samverkandi áhrifaþættir. Nýlegar rannsóknir sýna að sambandið og samspilið getur verið nokkuð flókið. Fullorðnir með hálsverki eru oftar með framhallandi höfuðstöðu en þeir sem eru einkennalausir, en þar er líkamsstaðan eftir sem áður ekki endilega eina orsökin.
Það sem virðist skipta mestu máli er samspil margra þátta, svo sem:
- langvarandi kyrrseta
- endurteknar og einhæfar hreyfingar
- lítil hreyfing yfir daginn
- streita
- lélegur svefn
- vöðvaþreyta
- mikil skjánotkun
Einkenni sem geta bent til Text Neck
Algengustu einkennin sem oft fylgja þeim sem þjást vegna mikillar skjánotkunar eru m.a verkir eða stirðleiki í hálsi, verkir milli herðablaða, spennuhöfuðverkur, verkir í öxlum, þreyta í hálsliðum og doði eða leiðniverkur niður í hendur.
Hvernig getur kírópraktík hjálpað?
Hjá Kírópraktorstöðinni er markmiðið ekki aðeins að draga úr verkjum heldur einnig að finna hvað viðheldur vandanum.
Við skoðun metur kírópraktor meðal annars:
- hreyfigetu háls og efra baks
- stöðu hryggjar og liðamóta
- vöðvaspennu
- liðleika
- styrk og stjórnun djúpra hálsvöðva
- hvort merki séu um taugaertingu eða önnur undirliggjandi vandamál.
Hér á Kírópraktorstöðinni metum við alla þessa þætti með fjölþættum og áhrifaríkum mælitækjum. Má þar nefna röntgen myndatöku, hita og taugaskanna, púlsskanna, líkamsstöðupróf og önnur mælitæki.
Sjálf meðferðin felur svo í sér hnykkingar og liðlosun/hreyfingar, einstaklingsmiðaðar æfingar og ráðgjöf um líkamsbeitingu.
Aðrar góðar lífsstílsbreytingar
Ef þú finnur reglulega fyrir verkjum í hálsi eftir skjánotkun, spennuhöfuðverk, stirðleika eða verkjum sem trufla vinnu eða svefn, er gott að leita sér aðstoðar hjá sérfræðing, til dæmis hjá kírópraktor.
Ef einkennin eru væg getur líka verið gott að horfa til ákveðinni lífsstílsbreytinga. Til dæmis að reyna að tryggja reglulega hreyfingu og gera styrktaræfingar. Þá er gott að reyna að bæta vinnuaðstöðu eins og kostur er og síðast en ekki síst er besta ráðið að reyna eftir fremsta megni að draga úr óþarfa skjánotkun.
Heimildir
- Piruta, J. o.fl. (2025). Physiotherapy in Text Neck Syndrome: A Scoping Review. Journal of Clinical Medicine.
- Mahmoud, N. F. o.fl. (2019). The Relationship Between Forward Head Posture and Neck Pain: A Systematic Review and Meta-Analysis. Current Reviews in Musculoskeletal Medicine.
- International Association for the Study of Pain (IASP). Text neck is not a pain in the neck.
- Yang, S. o.fl. (2023). Treatment of Chronic Neck Pain in Patients with Forward Head Posture.
